GPS буюу Global Positioning System нь дэлхийн аль ч цэг дээрх байршлыг нарийвчлалтай тодорхойлох боломж олгодог хиймэл дагуулд суурилсан технологи юм. Энэхүү систем нь үндсэндээ сансарт байрлах олон хиймэл дагуул, дэлхий дээрх хяналтын станцууд болон хэрэглэгчийн төхөөрөмж гэсэн гурван хэсгээс бүрддэг.
GPS хэрхэн ажилладаг вэ гэвэл, хиймэл дагуулууд тасралтгүй дохио илгээж байдаг. Таны гар утас эсвэл GPS төхөөрөмж эдгээр дохиог хүлээн авч, дохио ирэхэд зарцуулагдсан хугацааг хэмжинэ. Дохио гэрлийн хурдаар тархдаг тул хугацааг ашиглан тухайн хиймэл дагуул хүртэлх зайг тооцоолох боломжтой. Ийм аргаар дор хаяж дөрвөн хиймэл дагуулын мэдээллийг ашиглан таны тухайн үеийн байршлыг (өргөрөг, уртраг, өндөр) тодорхойлдог.
GPS-ийн нарийвчлалд цаг агаар, барилга байгууламж, уул нуруу зэрэг саад нөлөөлж болно. Гэсэн хэдий ч орчин үеийн системүүд алдааг багасгах янз бүрийн алгоритм ашигладаг тул ихэнх тохиолдолд маш өндөр нарийвчлалтай ажилладаг. Мөн GPS систем нь маш нарийн атомын цаг ашигладаг нь хамгийн чухал онцлогийн нэг юм. Хиймэл дагуул бүр дээрх цаг нь секундийн маш бага зөрүүг ч тооцоолох чадвартай байдаг. Хэрэв цагийн зөрүү бага зэрэг алдагдвал байршлын тооцоололд ихээхэн алдаа гарч болох тул маш чухал хэсэг юм. Дэлхийн таталцал болон хурдны нөлөөгөөр цаг хугацаанд үүсэх зөрүүг хүртэл засварлан тооцоолдог байна.
GPS нь зөвхөн газрын зураг харахаас гадна тээвэр, логистик, нисэх онгоцны удирдлага, хөдөө аж ахуй, аврах ажиллагаа зэрэг олон салбарт өргөн хэрэглэгдэж байна. Иймээс GPS нь бидний өдөр тутмын амьдралд чухал үүрэг гүйцэтгэдэг орчин үеийн технологийн нэг билээ.
